الي بغات تتعلم الطياب على حقو

قبل ماندخل في الطياب كلشي فينا كيعرف ليقامة او العطرية اللي كتستعمل في الطياب غير وكان قبل اللي خاصكم تفهمه انه نفس ليقامة تفننو بيها في الطياب وكتختلف الا بغيتيه صفر كتعملي ليقامة صفرة والا بغييته حمر كتعملي فلفل الاحمر تحميرة

دبا بغيت نقولكم على واحد الحاجة مهمة هي معروفة ولكن للمبتدئات نقولهلهم

في طيابنا كنعتمده بزاف على سكنجبير والخرقوم وليبزار باش منبقاوش نجبده هاد التلاتة كل ساع
انا في طيابي كنعمل واحد المسالة وكتجي رائعة كنساميها ليقامة مخلطة بمعنى فيما تسمعه ليقامة المخلطة او سكنجبير المخلط تعرفوني علاياش كنهضر انا نقوولكم كيفاش تعمللوه
كتشدي اللا كمية اللي غتكفيك مدة طويلة متلا 200غ ديال سكنجبير مطحون و100غ ديال الخرقوم مطحون و100غ ليبزار مطحون يعني سكنجبير يكون كتر منهم وكتشدي هاد التلاتة وكتخلطيهم في شي صينية واسعة مزيان بالمعلقة وكتبقاي تعمريهم في الحك ليقامة وبهكدا كيسهل عليك الطياب تفهمنا في ها نقطة ياك؟

دبا نجيو الدجاج
كنجيبو الدجاج من السوق مريش بطبيعة الحال وانا الا بغيته مقطع كنقول مول دجاج يقطعوليا على 4 ويحيدليا الجلدة لانها فيها مضرة مافيها حتى نفع كنشد ديك الدجاج وهنايا السر ديال دجاج بنين ومافيهش ماق زفورة نهائيا منين كتغسليه مزيان وتحيدليه داكشي اللي الداخل دياله وتغسليه ومن بعد ديريه يستقطر ومن بعد شدي الحامض ومرمريه في داك دجاج هو والملحة الداخل دياله وبرة وخليه واحد المدة فيه ومن بعد شلليه

ملاحضة الا كنتي شارية الدجاج قبل بنهار او مة طويلة بلا مايري الملحة غير الحامض حيت الملحة كتهري اللحم والا خليتيها مدة طويلة فيه يعني في الفريكو غيهرلك الدجاج في الطياب تفهمنا

وكل مشريتي الدجاج قبل بيوم او اكتر وعملتيه في الفريكو كل ماصدرة كتطيب بسرعة حيت منين كيكوون في نهاره صعيب على صدرة طيب

كترت عليكم ياك هههههههه ولكن راه هادي طريقتي في الشرح باش تفهمه اكتر
نجيو للنصيب بغينا الدجاج مرقة
كنشدو الدجاج نحطه في الطنجرة ونعملله الملح معلقة كبيرة سكنجبير مخلط مع نصف معلقة صغيرة ديال ليبزار مع شوية ديال الخرقوم كلورو الملون وشي 2 ضروس ديال تومة محكوكة وكنعملله الزيت مقدار نصف كاس صغير الزيت
في الحقيقة انا ليقامة والزيت عيني ميزاني ولكن دبا كيوجب عليا نعطيكم المقدار الصحيح ههههه
ومن بعد نخلي داكشي كيتقلى على نار هادئة جدا باش متحرقلياش العطرية ومابدمان داكشي كيتقلى كنشدو قسبور والمعدنوس نقطعه من الاحسن الا كان عندكم في الفريكو واجد باش يسهل عليكم الطياب هو التومة ولكن ماكاين باس متلا عندك درهم ديال قسبور ومعددنوش كمية معقولة وتقطعيه رقيق باش مايجيش باين في الطباب قد رجليك ههههه كانت كتقولهاليا جدة الله يرحمها ونجيو للبصلة بغيتي تعمليه الدجاج بوحده غتعملي البصلة كتيرة بغيتي معاها الخضرة غديري غير بصلة وحدة كببيرة فهمته المهم كتشدو البصلة كتقطعها حتى هي صغيرة وتعمله داكشي يتقلى مع العطرية وتبقاو تحركو المعلقة تقلبوه صافي منين تحسه ان الدجاج شرب ليقامة وخدا اللون المناسب كتعملله الماء اللي يغطيه ماشي بزاف باش مايبسلش الطياب

وكتغطيه عليها وكتخليه يطيب طبعا حنايا في عصر السرعة كوكوط ههههه مابقاش الخاطر للطنجرة منين دوز تلت ساعة على تصفار الكوكوط كتفتحه عليه الا بغيته دجاج بوحده كتكونه موجدين كمية ديال البصلة مشلضة وكتزيده عليها باش تختار المرقة الا كنت غتزيدي شي نوع من الخضر غديري غير الخضرة بوحدها والبصلة غتكوني درتيها في الاول وكنسدي عليه ومنين كتحسي انه داكشي بدا كيطيب كتخليه وكتعمليه يتغرا مزيان وكدوقي الملحة واش هي هاديك وبالصحة والراحة

يتبع دبا مع الدجاج المحمر

المهم نجيو الدجاج محمر ديال العراس كنت خديت طريقة من منتدى والحمدلله منين وليت كنديرها تقوليني غير طيابة ديال الموسم هههههههههه

باركة عليكم غير دجاجة ديرو فيها التجارب
كنشدو ديك مولاتي الدجاجة الي مغسولة وناضية كيف قلتلكم كنخليوها على جنب
كنشدو بانيو صغير ونكرضو تكريضة كبيرة ديال قسبور ومعدنوس كول ماكان كتير كول مكيجي زوين الدجاج وكنعمله شي 6 ضروس ديال التومة محكوكين وكنشدو شي بصلة كبيرة محكوكة ومعلقة صغيرة السمن وكتشدي ليقامة المخلطة ( اللي قلتلكم عليها) والملحةو معلقة صغيرة ديال بسيبيسة وقعقلة مطحونة وكتزيدو شوية ليبزار الا بغيته و الخرقوم الملون معا شوية ديال الزعفران شعرة وكتشدو الحامضة 1 مرقدة وتحيدولها الجلوف ديالها كترميوه وديك قشرة ديال الحامضة اما تحكوها في الحكاكة رقيقة او طحنوها هي اللي كتعطي مداق زوين وكتعملي ربع كاس زيت بلدي +نصف كاس زيت رومية او اقل وكتخلطي ديك ليقامة مع بعضها وكتشدي ديك الدجاجة وكنشرملوها مزيان في داك ليقامة مزيان الداخل ديالها ومابين الضلوع مانخليو ببها حتى قنت الا ونشرملوه ههههههه وداك الكبيدة ديالها والقنصة والعنق حتى هما وكتخليو من داك الخليط شوية وكتعمله دجاجة في طنجرة وتزيده عليها ديك الخليط وديك القنصة والعنق والكبدة لا حتى من بعد باش متفرتتش وتعمللها الماء اللي يغطيها ومن بعد نديروها طيب بلا ماتقلا من نصف ساعة في نحلو عليها ونزيدو عليها واحد 3 بصلات كبار مشلضين ونسدو عليها من جديد منين تحسي ديك البصلة طابت مانخليوهش بزاف كيطيب الدجاجباش مايهراش غير نحسه بيه طاب هو البصلة كنحيدو دجاجة كنزيدو على ديك المريقة الكبدة وزيتون الخضرة مغسول وبلا مانسدو عليها ونخليوها طيب ديك الكبدة ونيت تغرا داك المرقة ومنين تشوفها بدات كتغرا بقاو تحركوها باش متلصقش داك البصلة والكبدة ونيت باش تحمر على نار هادئة جدا متخليوش فيها حس الماء تجي مشحرة تماما
ودجاجة الا بغيتو تحمروها في الفران او تقليوها في زيت اللي بغيته
من بعد كتوجده طبسيل تحطه فيها ديك دجاجة وكتزيدو عليها ديك المريقة وهاهو الدحاج محمر واجد وبالصحة وراحة وانا عييت هههههههههه بالكتابة شي كاس الما

++++ ايوا منين تطيب صفيها من مرقة ديال دجاج وشدي شوية زبدة وخلطيها مع كنور او موطارد اللي عندك ودهني بيها ديك دجاجة وتشوفي كيفاش غتحمر وفي نفس الوقت غتكون لدية غير انتيا خاليها في الفران تحمرر على خاطرها ومنين تشوفيها تحمرات حيديها

باقيين مع الدجاج دبا مع دجاج اللي كيجي فحال مداق ديال الضلعة

هاد الدجاج انا متاكدة ان شاء الله الا جربته غيعجبكم بزاف وغتبقاو ديروه ساهل
كتشدو طراف الدجاج تعملوه في الطنجرة وتشدو ديك ليقامة المخلطة اللي قلت يااااااديه ليقامة مخلطة اللي مع بنت سلا ههههههههه وصافي بغيت نخليلكم شي سوفونير خخخخخ تفكروني بيه
ماعلينا كنشدو كيف قلتلكم دجاج في طنجرة ونعملله معلقة كبيرة ديال ليقامة مخلطة ومعلقة كبيرة السمن و5 ضروس كبار محكوكين وزعفران شعرة والخرقوم ملون وتزيدو شوية ليبزار الا بغا مابغاش بلاش راه هو اصلا كاين في ديك ليقامة مخلطة
كتخلطو هادشي اللي قلتلكم مزيان في الدجاج بيدكم ومن بعد تزيدي ربع كاس ديال الزيت زيتون وربع كاس زيت رومية وكتعملي الماء الكافي اللي يغطيه وتسدي عليه بلا ماتقيليه بلا والو

ملاحضة هاد الدجاج مافيه لا قسبور ومعدنوس ولا بصلة والة ولكن كيجي رائع
منين تحسي بيه بدا يطيب حالي عليه مايكونش فيه الماء بزاف كيجي فيه غير شوية المهم هو البنة وراه كايكون محمر غير في الكوكوط والا بغيتي تحطي فوق منه البطاطا فريت وبالصحة والراحة

دبا مع دجاج بالتحميرة كاين اللي كيبغيه حمر كل واحد وكيفاش انا غنقلكم طريقة تعملوها في الفرن كتجي لديدة بيه

 كتشدي تومة شي 6 ضروس صغار وقبطة كبيرة قسبور ومعدنوس مكرضة و معلقة كبيرة تحميرة و ومعلقة كبيرة الكمون ومعلقة كبيرة ديال ليبزار ومعلقة كبيرة ديال لصوص طوماط ديال الحك والزيت خلطي كلشي في ديك الدجاج وعمليه في المول وعمليله الماء وجدخليه يطيب على راحته
ملاحضة يمكلك تعملي هاد الطريقة حتى في البطاطا وتخشيها في الفران عرفتي ماتسخيش بيها كتجي لديدة بزاف

المهم غادي نقوليكم طرقة الدجاج بالزبيب


تنشدو الدجاج بعد ما نغسلوه غادي نقوليكم انا طريقتي في غسل الدجاج ملي تنجيب الدجاج من عند مول الدجاج ما تنقيسش ليه الماء تنشد الملحة و نبدا نحك بيها الدجاج مزيان حتى تنحيد منو دول الجلود مزيان نحكه طرف بطرف ملي تنحكه مزيا ن تنديرو في شي طنجرة و نطلق عليه الماء مزيان و نبدا نغسله مزيان و نسقطرو و نعاود نغسلو و نسقطرو 3 مران باش ما تبقاش فيه الملح من بعد ندير الماء في طنجرة و ندير معاه الخل و نخليه فيه شي 15 حتة ل20 دقيقة و نغسله و نسقطرو
ايوا ندوزو للدجاج بالزبيب تنشده الدجاج نديرو عليه اسكنجبير و الخرقوم و البزار و شوية ديال قزبور و معدنوس مدقوقين مع شوية ملح و شي عويدات دياول القرفة و الخرقوم الملون و نضيفه عليه القياس ديال الزيت على حسب كمية الدجاج ايوا و نشلظو شي بصلة و نخليو داكشي يتشحر مزيان و فداك الوقت نشدو البصلة على حسب كمية الدجاج و ننكردوها مشنفة ايوا ملي يتشحر داكشي مزيان تنمرقوه و نضيفه ليه البصلة حيت الدجاج دغيا تيطيب تيجي طيابه مع البصلة هو هداك و تنضيفه شي ملعقة قرفة مدقوقة و ملعقة سنيدة و نخليو داكشي تيطيب تنشدو الزبيب تنغسلوه مزيان و نخليوه شوية في الماء و من بعد نظيفه للطنجرة و نخليو داكشي يطيب صافي و نبقاو نمرقه وقتما شرب حتى يطيب الدجاج و البصلة و ما نخليوش فيه المرقة بزاف و نطفيو عليه و قدميه بالصحة و الراحة
من الاحسن هاد الوصفة تتدار في الطاجين تتجي لديدة



ايوا دابا اخواتاتي نحط ليكم طريقة الدجاج مبخر


طبعا الدجاجة تتكون ممقطعاش تنشدو الشعرية الصينية تنكبو عليها الماء طايب و نسقطروها و نقطعوها ما نخليوهاش طويلة هاكاك ايوا تنشدودوك الكبيدات و الكانصة ديال الدجاج و نصلقوهم و نقطعوهم طريفات صغار و نزيدو عليهم قزبور و معدنوس بزايد و التومة محكوكة و سكنجبير و الخرقوم و البزار و الخرقوم الملون و نصف مصيرة نقطعوها طريفان و الزيتون الزيتون حتى هو نقطعوه طريفات صغار و الملح القياس و نخلطو هادشي كامل و نعمرو بيه الدجاجة و نخليو شوية ديال القوام (بزار و سكنجبير و خرقوم و قزبور و توم ) ندهنو بيه الدجاجة من الفوق و نديروها تتبخر شي ساعة و ربع تقريبا نبقاو نقلبو واحد الملاحظة باش نعرفو الدجاج طاب ولا باقي تنقلبوه من العنق حيت هيا البلاصة اللي تتشد الطياب في الدجاج الى لقينا العنق طاب صافي الدجاج طاب نحيدوه من الكسكاس و ندهنوه بشوية ديال الزبدة و نخلوه الفرن يتحمر و نقدوه بالصحة و الراحة

المروزية

كتمشي عند العطار كتقوله عطيني ليقامة المروزية كيعطيهالك مخلطة هو كيعرفها كيعمل فيها بسيبيسة وقعقلة وراس الحانوت وشي تخليطة وكتجبيها الدار وتعمليها في شي قريعة باش تبقالك محافضة
بالنسبة للمروزية اللي كتعمل فوق اللحم كتطيبي اللحم عادي
وكتشدي زبيبب تغسليه مزيان وتخوي عليه ماء طايب في شي طويسة باش يتنفخ من بعد صفيه وشي طنجرة صغيرة وعملي فيها معلقة صغيرة ليقامة المروزية سكنجبير الخرقوم وشوية زعفران شعرة وخرقوم ملون وشوية ليبزار وشوية زيت وشوية القرفة والملح بطبيعة الحال كتعمليه فوق العافية غير كتشوفي داكشي تمزج على نار مهيلة باش متحرقش زيدي عليه شي 3 كيسان صغار الماء وزيدي ديك الزبيب وغطيه وخليه يطيب منين تحسي بزبيب طاب وبقا فيه قطيرة المرقة كتكوني موجدة اللوز مهرمش وكتزيي على ديك زبيب وكتعملي معلقة كبيرة سنيدة او العسل اللي موجود عندك وتبقاي تقلبي بالمغرفة على داك الزبيب واللوز حتى يشد راسه فوق العافية وهاهو واجد بالصحة والراحة عمليه فوق اللحم وهاد الطريقة يمكلك تعمليها حتتى البرقوق والمشمش



بالنسبة للشعرية بمطيشة
كتشدي شي 4 حبات مطيشة وتحيدليهم القشور وتقطعيهم صغار وشي بصلة محكوكة وكتشدي شي 2 بصللات حتى هما قطعيهم صغار وعملي شوية سكنجبير والخرقوم الملون وليبزار وكتشدي ربطة صغير ديال قسبور ومعدنوس بلا ماتقطعيها تجمعيه بالخيط والملح وكتعملي كلشي في طنجرة وتخليه داكشي يتشحر في الزيت ومن بعد عملي الماء شي نصف الماء في طنجرة اللي يدر الشعرية وغطيه على ديك المرقة منين تبدا تغلا زيدي عليها ديك شعرية وبداي دوري بيدك بالمعلقة اللوح باش متعجنش كتبقاي هكدا حتى كتحسي بيها طابت ونشفات من الماء وكتحطيها بالصحة والراحة كتشدي الشعرية تعمليا التحت وديك مطيشة والبصلبة من الفوق والا كان عندك شي طريفات دجاج والكبدة والقنصة عمليهم يطيبه عاد زيدي الشعرية

بالنسبة للروز بمطيشة
كتشدي شي 2 معالق كبار ديال مطيشة الحك وشوية ديال سكنجبير والملح وليبزار والتحميرة وقسبوور ومعدنوس مقطع وشي 2 ضروس التومة محكوكة وشوية ديال الزيت وكنور دجاج وخا انا مكنعملهاش في طياب ولكن كتبنن حتى هيا وكتشحري داكشي من بعد كتزيدي عليه الماء وتخليه يغلى وكتزيدي عليه الروز شتي الا بغيتي روز يجيك ناشف ومافيهش الماء متلا عندك زلافة الروز ديري معاه زلافة الماء باش تجيك هي هاديك سي عليه واحد 15 ربع ساعة وديري بالك معاك .



بغرير

3   كيسان العنبة السميد رقيق ويكون مزيان باش يصدقلك بغرير
1 كاس العنبة فورص
4 كيسان الماء دافئ
شوية خميرة معجونة + خمارة الحلوى
كتعملي كلشي في مولينكس وتخليه يتخلط مزيان من بعد كابيه في بانيو وغطيه في مكان دافئ من بعد ربع ساعة او اكتر حتى تشوفيه خمر ومتخليهش بزاف باش ميعقدش وبداي طيبيه في ساع وبالصحة والراحة

الحريرة

كتشدي 2 بصلات كبار كتحكيهم في الحكاكة وكتزيدي عليها واحد مولاتي ربطة ديال قسبور ومعدنوس كبييييييييييييرة مكرضة هههههههه باش يجيك زوين وكتزيدي نصف معلقة صغيرة ديال سكنجبير نصف معلقة صغيرة ديال القرفة شوية ملون واحد نقطة غير باش يغير اللون الملحة واحد قطيرة الزيت ماشي بزاف + معلقة السمن كتخلي داكشي يتشحر مزيان فوق العافية في شي طنجرة خليه يتشحر على نار مهيلة مزيان حتى يعطي ريحته هههههه ومن بعد قلبي الخليط في الكوكوط زدي عليه العدس والحمص مفرك انا كنعمل كلشي في خاطرة وكتزيدي عليها لصوص مطيشة عاية مطحونة وكتعملي الماء الكافي يعني يكون بزايد وتسدي عليها تخليها واحد ساعة الا ربع حلي عليها لقيتي الحمص طاب شدي واحد 3 معالق كبار مطيشة الحك وتخلطيهم في شوية الماء باش متكورش بيدك في شي بانيو وعمليه فوق الطنجرة وبداي تحركي بممغرفة وخليه يغلا بلا ماتسدي عليها منين تحسي بمطيشة ندمجت وبدات طيب كتشي الطحين كتعمليله حتى هو الماء يجي سائل فحال بغرير وبقاي نتيا كتزيدي شوية بشوية وانتيا كتشوفي الحريرة واش بدات التقال صافي حبسي الطحين متعمليهاش تقيلة بزاف غير جهد اللي يخترها وصافي حركي شوية حتى يطيب الطحين وهاهي واجدة



الملوي قصدك هو المسمن
المهم يلالا مثلا كياو دقيق قمح تنزيد عليه شوية ديال الفورص و شي معلقة صغيرة خميرة معجنة و شوية ديال الملح ايوا و تبقاي تزيدي الماء دافئ حتى تجمع العجينة و تبقاي تزيدي في الماء بشوية بشوية و تدلكي مزيان و العجين ما يكونش تقيل يكون خفيف و مدلوك مزيان ايوا و بداي تقطعي في العجين كويرات صغيرة انا شخصيا تيعجبني المسمن يكون صغير تيجي طايب مزيان و مورق ماشي بحال الكبير و حتى شكله تيجي زين ايوا و تبداي تورقي في الكويرات الصغيرةو تتنيهم من يمين و شمال حتى تحصلي على شكل مربع و تبقاي تعملي كده حتى تكملي كل الكويرات ايوا تكوني حاطة الزيت لوسيور في شي زلافة حداك شعلي للمقلا ة البوطة و تكون العافية متوسطة ايوا بداي تورقي المربع بالزيتو ترشي المقلات بالزيت و ديري فيها المسمنة و ترشيها من الفوق بالزيت و تبقاي تقلبي فيها حتى الطيب و تديري الاخرى و هكدا حتى تكمي كل العجين ان شاء الله نحاول نصوره ليك شي نهار ملي نديرو في الخدمة .

طاجين ديال الحوت

من الاحسن يكون شي حوت هبرة بحال الطون متلا المهم نغسلو الحوت و نعمله ليه الشرمولة اللي تتكون من القزبور و معدنوس مدقوقين مع الملح نزيدو عليهم التومة مدقوقة و شوية ديال التحميرة و سكنجبير و الخرقوم و المولون و البزار و اللي تيحب الحال شوية ديال السودانية مدقوقة ايوا و نعصرو شي حامضة على هادشي و نخلطوه نخليو منه شوية في تبصيل و الباقي نشرملو فيه الحوت ايوا و نحطوه على جنب نقطعو مطيشة دواور و الفلفلة خضرا دواور ايوا نشدو نص الفلفة نفرشوها في الطاجين و نحطو فوقها الحوت و من فوقو مطيشة و من فوقها الباقي ديال الفلفلة و نديرو الزيت من الفوق و داكشي اللي بقا من الشرمولة نزيدو فيه 2 كيسان ماء و نكبوه من الفوق و نديرو الطاجين يطيب ما تيتحركش هاد الطاجين ملي تيشرب مزيان تنقدموه بالصحة و الراحة تيجي زوين ملاحظة كاين اللي تيحب يدير فيه بطاطا و خيزو حتى هما تيجيو زوينين نفس الطريقة غير هنا تنفرشو خيزو من لتحت و نديرو من فوقه الحوت و من فوق الحوت بطاطا و من فوقها مطيشة تم الفلفلة و الزيت و الشرمولة مع الماء .

الكرعين

كتكوني قسماهم وكتعمليه في طنجرة كوكوط وكتعملي عليهم الحمص الكمية اللي بغيتي وكتشدي التحميرة واحد 3معالق كبار وكتشدي 2 معالق كبار الكمون واحد راس كبير اللي فيه التومات عرفتيه كيكونه مجموعين فيه توم هداك كتشدي كتحكيه كامل باش يجي بنين وكتعملي واحد معلقة ديال سكنجبير ومعلقة ليبزار والملح وقطيرة الخرقوم كلورو وكتعمليله الزيت وشوية زيت بلدية متكتريش وكتعملي الماء شوية عايم باش ميشفلكش حيت كيبغي الكرعين الطياب خليه ساعة ومن بعد حلي عليه والا لقتيه طايب عامليه يتغرا والا لقيتي باقي خليه واحد الشوية وهاهو بالصحة والراحة طايب
والا مفهمتيش شي حاجة قوليها كاين اللي كيعمل البصلة انا لا مكنعملهاش
اه وكاين اللي كايبغيه حلوين بالنفع والسكر  

* انا ندوز وندير لك تفتيش فطريقة الطياب
زيدي الالا التحميرة
والحمص
وممكن ديري الكموسات ديال الروز او القمح مرطب
اما الا كانت عزيزة عليك بالبصلة زيديه الزبيب والقرفة وديري كموسة ديال الروز مخلط بالزبيب
ماما فطريقة ديال الطياب
كدير واحد الطريقة زوينة
كديرهم فكوكوت كبيرة وكتحطها فوق البوطة حتى تيدا تصفر شي 20 دقيقة
كديرهم بالليل مع 12 ليل
وكتشعل الفاخر وكتحط الكوكوت فوق المجمر
وتخليه اطيب على خاطر خاطر مع الماء الكافي تحط المجمر فبلاسة مهوية
مديروهش فالسطح او البالكون غدي امشي ليكم الفخار دغيا
بلاصة تكون مهوية المهم



المسن كيجي غزال

نصف كيلو الطحين فورص يكون زوين ديال البكية تريا او اي مارك اخرى
نصف كيلو ديال الطحين سبسيال
معلقة صغيرة الخميرة العجين
ملحة
الماء دافئ
نعجنوها مزيان بالماء دافئ فحال العجينة وتبقاي دبزي فيها وتعركي باش متجيش معجنة ومتديريهاش قصحة بين وبين وكتعمليها كويرات صغار وكتخليهم واحد شوية يخمره شي 10 دقائق هكاك
وكتشدي شوية السميدة رقيقة تعمليها في طبسيل
زبدة مدوبة تعمليها في شي زلافة تكون كتيرة وتزيدي عليها الزيت
ايوا كتشدي داك الكورة كتطلقيها بيدك مزيان على شكل دائرة والقنات حتى هما ومن بعد كتاخدي شوية بيدك من ديك الزلافة اللي فيها زبدة مدوبة وزيت وكتحطيها فوق الدائرة وكتعمليلا رشة من داك سميد رقيق من بعد كتنيها على 2 من جهة اليمين واليسار كتجي على طول وكتعملي عوتاني شوية اللي في زلافة وسميد ايوا وكتمشي طرف ديال العجينة وتبقاي ترولي ترولي ومن بعد سيري فوق داك رولو وهبطيه بيدك راك كتعرفي الملوي كيفاش يكونو وكتكملي كلشي على هاد الشكل وبداي تكرصي وطيبيي في مقلاة تقيلة ايوا هاهما ملاوي ديال الشهوة هههههه بالصحة والراحة .

شليضات

الروز كتصلقيه منين يتصلق تعمليه يبرد ومنين يبرد كتخلطيه مع المايص درة والطون وكتقطي شوية زيتون خضر الا عندك وكتعمليله شوية الخل والملح وليبزار وزيت
والا عندك مايونيز يكون احسن والد

عاوتاني كاينة شلاضة كتجي بنينة ولديدة
كتشدي مقرونية وكتصلقيها مع شوية زبيب ومنين يتصلقه كتعمليهم يبردو وكتشدي تخلطيهم مع الطون وكتخلطي كلشي مزيان وتزيدي الملح الا كان مسوس وشوية الخل ومنين تحطيها في طبسيل شدي حكي فوق منها فرماج الحمر عرفتي كتجي كتحمق متسخايش بيها

وكاين عوتاني القوق كتصلقيه منين كيتصلق كتقسميه على 2 وكتعمريه ببطاطا وخيزو والروز مصلوقين ومخلطين وفيهم ليقامة

تيديرو لاصوص بواحد مطيشة تتباع في مرجان ممكن تكونو عارفينها tomate pelee تتكون مرقدة مطيشة على شدها و ماها و مقشرة المهم و لكن تتكون غالية شوية المهم دوك الطليان ملي استقرو هنا بداو تيقادو مطيشة بوليي ديال العام و انا الحمد لله استافدت و اتعلمت الطريقة حيت راكم عارفين الطاليان مع    les pates رئيسيين عندهم
ايوا يا اخواتاتي تيشدو ديك مطيشة اللي تتكون في الصيف طويلة و حمراء احنا هنا في مراكش تنقولو ليها مطيشة ديال اكادير المهم تيشريو بزاف مطيشة و تتكون رخيصة ديك مطيشة في الصيف حيت تتبان هيا غير في الصيف و تتكون حلوة تنشدو مطيشة تنغسلوها و تنحطوها في بانيو كبير و تنكونو رادين شي كدرة كبيرة ديال الماء ملي تيغلي داك الماء تنخويوه على ديك ماطيشة اللي اللي غسلنا و درنا في البانيوتنخليو عليها داك الماء طايب شي شوية و تنجلسو نشدو موس و نبداو نقشرو ديك مطيشة و نحيدو ليها داك الرويس ديالها اللي لفوق بالموس و نعصروها شوية و نرميوها في شي بانيوحتى تنكملو ديك مطيشة تنكونو موجدين شي قراعي ديال الزجاج يكون زجاجهم قابل للسخونية من بعد غادي تعرفو علاش
تنكونو غاسلين البازيليك اي الحباق اللي وراقو تتكون كبار تنكونو حاطينو على جنب
تنشدو ديك مطيشة اللي نقيناها و نبداو نعمروها في القراعي و نحطو معاها وريقات ديال البازيليك تنداكسوها مزيان في القرعة تتكون مطيشة على قدها ما مقسوماش ملي تتعمر القرعة تنسدوها مزيان نزيروها و نحطوا على جنب ملي تنكملو الكمية اللي عندنا تنشدو شي برمة كبييرة احنا حيت كنا درنا شي 250كيلو ديال مطيشة شدينا دول البرامل دياول الحديد الكبار و ستفنا فيهم القراعي اللي عندنا و عمرنا داك البرميل بالما و تقلنا دول القراعي مزيان من الفوق بالياجور ايوا و تنشعلو ليه الفرنو و نخليو يغلى 45 دقيقة و صافي نحيدو للقراعي و نحطوهم مقلبوبين ملي يبردو ستفيهم في البلاكار و هانتي تهنيتي من مطيشة
اولا تتكوني عارفة اش تتكلي مللي تتبغيهم تتجبدي قريعة و تدوزيها في مكينة ديال مطيشة و تديري بيها اش بيتي للحريرة ولا لاصوص
ايوا دابا نقوليكم شي نواع دياول les pate

 les pates بالدجاج



ايوا يا اخواتاتي بعد ما تنغسلو الدجاج بالطريقة اللي دكرنا في الاول على حسب الاشخاص المهم الطير ديال الدجاج تيكون مقطع تنشدو شي بصلة تنشنفوها و نديررو زيت بلدية في شي طنجرة و نديرو ملح و شوية ديال البزار و نخليو البصلة تبدا تقلا و من بعد نديرو الدجاج نخليو تيتقلا و تنشودو ديك مطيشة اللي درنا في القراعي على حسب كمية الدجاج و تنديروها في مولينكس و نزيدو عليها 2 فلفلات حلوين خضرين و نطحنهم مزيان و ملي يتقلا الدجاج في الزيت مع البصلة تنزيدو عليه الخليط اللي طحننا و نديرو شي 2 روس ديال التومة و شي وريقات ديال قزبور و معدنوس و شي وريقة ديال سيدنا موسى و شي 2 معالق كبار مطيشة ديال الحك و نخلي داكشي تيغلى مزيان و نزيد فيا الماء الكمية الكافية فاش يطيب الدجاج و نخليو داكشي تيطيب ملي يطيب الدجاج نخليو لاصوص حتى يعقد مزيان و نطفيو على داكشي تنشدو ي اما سباكيتي ولا les penes هما دوك ليبات اللي تيكونو طوال و مجعبين تنكونو رادين الماء في شي طنجرة ملي تيغلى تنديرو فيه ليبات و نديرو معاهم الملح و نخيلوهم يتسلوقو ماشي تاني نطيبهم بزاففففففف حتى يتعجنو غير القياس شي 15 دقية و تيطيبو تنطفيوهم و نخلطوهم مع لاصوص و نحطو الدجاج في طبق تاني و نحكو عليهم الفرماج و كولوهوم بالصحة و الراحة .



نجيو دبا لصوبا كاين 2 انواع انا كنعملهم

كنشدو الخضرة شي 4 خيزوات وشي 3 جرعات وشي 2 بطاطات وشي شوية الكرافس وشوية معدنوس وشي 2 لفتات و مطيشة شي 3 وكتشدي داكشي كتنقيه وتقطعيه طراف وتعمليله شوية زيت وملح وشوية سكنجبير وليبزار وشوية الملون وكنور دجاج او اي نوع وتعمليله الماء اللي يطيب فيه ومنين تحسي بيه طحنيه في طحانة وديري فوق العافية في شي طنجرة وخاليه يغلى شوية بغيتيه هكاك صفر كتخليه هكاك بغيتيه حمر كتزيده معلقة مطيشة الحك
وكتخليها تندمج مع الخليط فوق العافية وهاهي واجدة



* نفس شيء ولكن حيدي الكرافس من هنا خليهم غير للحوت والحريرة
زيدي البصلة والبورو
الربيع حتى الطيب من الاحسن ممكن ديريه فالاول ماشي مشكل
اما ليقامة لالالالالالالالالالالالالالالالالالا
شوية ملح وزيت ملي ابداو اطيبو
وملي طيب زيد شوية البزار او خليها بلاش
وسر فالصوبا ساهل
هو انا الخضرة تكون جديدة وغير شوية الملح لانها نلي كتكون جديدة كتكون مزال غنية بالاملاح المعدنية
الملونات لالالالالالالالالالالالالالالالالالالالالالالالالا لالالالالالالا
لون ديال الجزر اكون حسن ولا كانت القرعة الحمرا زيدوها حتى هيا كتجي غزالة

نجيو دابا لطحين
انا صراحة عزيز عليا تكون مطحونة بمكينة اليد وياش تجي بنة غزالة
زيدي فرماج la vache qui rit
هو الامدرتيش الملح كثيرة هو غدي املحها .



واحد سباكيتي ساهلة و تتعجبني بزاففففففففففففف
تتديري الماء حتى يغلى و تديري فيه الملح و ترمي فيه سباكيتي و تخليها تغلى و مرة مرة تبداي تقلبيها واش طابت واحد الملاحظة احنا تنديريو واحد الغلط تنطيبه ليباط بزاف داكشي علاش تينفخونا فاش تناكلوهم الايطاليين تيطيبوهم غير القياسشي 15 دقيقة بالكثير المهم تنصفيو سباكيتي اللي درنا تتطيب و نخليو نصف كاس ماء من داك الماء اللي سلقنا فيه سباكيتي تنصفيوها و نديروها في شي طنجرة و نزيدو عليها 2 بيضات و شي طرف كبير ديال الزبدة نصف باكية زبدة بدوية عرفتوها يا و نحركو مزيان نردو الطنجرة على عافية مهيلة شي 2 دقايق و نحطوها نحكو عليها فرماج و ناكلوها

l es pates بالكفتة
على فكرة الطرق اللي تنحط ماشي بالطريقة المغربية بالطريقة الايطالية اللي تعلمت منهم من بعد نحط ليكم الطريقة المغربية
المهم تنشنفو نصف بصلة و نديروها في طنجرة تنزيدو عليها زيت الزيتون و ملح و ابزار و نبداو نديوها و نجيبوها في الزيت من بعد نضيفو عليها الكفتة و نبداو نقليو في الكفتةحتى يتغير لون الكفتة و نجبدو شي قريعة ولا جوج من ديك ماطيشة اللي كنت قلت ليكم على طريقتها ملاحظة الى ما كانتش عندكم سلقو مطيشة عادية و قشروها و طحنوها على داكشي اللي في الطنجرة بالماكينة ديال مطيشة اليدوية لانها تتزيل ليها الزريعة تنضيفو على الخليط شي 2 ضروس توم و وريقات قزبور و معدنوس و شي 2 معالق كبار مطيشة ديال الحك و نخليو هادشي يطيب بالطبع تنزيدو عليه قياسه ديال الماء فاش يطيب ملي تيطيب نخليو لاصوص يختر و نطفيو عليه تنكونو رادين الماء يغلي تنضيفو عليه ليبات سباكيتي ولا دوك الجعبات الطوال يطيبه نصفيهو و نخطوهم مع لاصوص نحكو عليهم الفرماج

les pates بالعدس
تنشدو العدس تنديروه في طنجرة و تنزيدو عليه قياس ديال الماء و شي 2 ضروس حتى ل 3 ديال التومة + وريقات ديال قزبور و معدنوس+ وريقات ديال الكرافس+ورقة سيدنا موسى+شي مطيشة مقطعة+زيت الزيتون+ملح+ابزار و نخليو هادشي تيطيب ملي تيطيب العدس تنطفيو على الخليط ما تنشربوش الخليط بزاف من الماء تنخليوه جاري شوية ماشي بحال العدس اللي تنطيبوه احنا هادا تيكون جاري شوية المهم تنكونو كيف القاعدة رادين الماء تيغلى تنظيفه ليه ليبات ملاحظة ليبات اللي تيمشي مع العدس تيكونو صغار شوية دوك الجعبات الصغار كاع تيطيبو تنطفيو عليهم تنشدو داك العس اللي طيبنا تنقيوه من المعدنوس ووراق الكرافس و التومة و مطيشة و نضيفه لليبات و نقدوه بالصحة و الراحة تيجي زين مداق الكرافس تيعطيه و احد المداق رائع .

نعطيك انا واحد حتى هي كنجي زوينة
وسااااااااااااااااااهلة
مهم كنخدي لبات لي ملويين بحال لي vises لي ملونين او ممكن لي عجبك
تصلقيهم
نجيو لصوص
فلفل خضرا + ثوم+طون+شمبنيون
الفلفل خضرا كتحكيها وتحكي الثوم وتقطعي الشمبنيون وديريهم فالمقلة الا كان طون بالزيت قليهم بيه من الاحسن
او وصاففيييييييييييييييممكن ترشي الفرماج الا بغيتي


سر ديال البنة في طياب متكتريش الماء وعملي ليقامة مزيان ماشي شوية ومنين طيب ضروري ومؤكد تغري المريقة باش تختر وتولي زوينة

شوفي الطياب اللي كتبت وهانا غنزيد شي حويجات دبا ان شاء الله ينفعوك

وبالنسبة اختي الاسبوع ديالي كنعمل فيه نهار لحم نهار كفتة نهار دجاج نهار عدس نهار فول نهار لوبية نهار كسكس
بالحق نهار اللي كندير فيه لوبيا او العس لغدليه كندير شي حاجة فحال لحم او جاج بعد الخطرات ندير يومين دجاج ولحم الا كان موجود على حسب التساهيل اختي والرزق اش يجيب نقدر الاسبوع اللي موراه ميكونش فيه هاد الروتين متلا طيحان او شكانبة اللي هي دوارة او الكرعين والعشا بيتزا بعد الخطرات ليباط روز شوفي كل واحد ورزقه كيفاش عامل غير انتيا حاولي تنوعي فهمتي باش يكون عنك تجديد وتبعي معانا وان شاء الله طيابك يكون بنين ومتنوع .

الكفتة بالبطاطا

كنشدو كمية الكفتة اللي عندنا ونعمللها ليقامة
تحميرة وكمون وملحة وقطيرة ليبزار و شوية قرفة والا عندكم قسبور حبوب عملوه حتى هو وقسبور ومعدنوس مكرض وكتخلطه داكشي مع الكفتة وتكوريها وتعمليها نيشان في طنجرة ونعملولها شوية زيت ونعملها تشحر ومنين تشحر في ديك زيت كتزيدي عليها بطاطا مقطعة وكتحكي عليها شي 2 مطيشات وكتعملي فيها شوية الماء وتسدي عليها شي ربع ساعة او كتر دغيا كطيب ومن بعد تغريها

ويمكلك ماتعمليش بطاطا تعملي بلاصته روز تخلطيه نيشان مع كفتة وتكوريها

وكاين الكفتة والبطاطا في الفران

داكشي اللي غديريه في طنجرة ممكن تعملي في الفران يطيب وكيجي غزال ومحمر

وكاين كراطان

كتشدي البطاطا مصلوقة ومطحونة وتعمليلها وشوية ليبزار والملحة وكتفرشي نصها في المول مدهون بالزبدة ومن الفوق كتعملي كفتة مشحرة في طيفال مع شوية الملح وليبزار وتحميرة الا بغيتي وكتعملي لصوص بيشاميل وكتغطيها بديك نص الاخور اللي بقا من البطاطا وعوتاني تعملي لصوص بيشاميل وتحكي فروماج كتجي لديدة بزاف


هاد الطريقة ديال الكفتة

مكتحتاج لا شواية لا زيت كتحتاج غير حاجة بسيطة الا وهي

كتكوني قايمة الكفتة عادي وكتشدي المقلة تقيلة كلشي كيعرفها اللي كنعمله فيها الملاوي كتشديها تعمليها فوق العافية وتشدي شوية الماء اللي يترش في مقلة كاملة وتشدي ديك الكفتة تعمليها على طول فحال اللي غتشوي عادي على نار مهيلة وتخليها تطيب واجي تشوفي كيكتجي متقوليهاش مطيبها في الماء

اذن بغيتي تطيبي مرق الدجاج مثلا أجي نوريك :

دجاج + ماء + والو

يعني تقفلي الطنجرة وليس فيها سوى الدجاج والماء

تخلي الدجاجة تغلي فهداك الماء تقريبا نصف ساعة .
ثم تحلي الطنجرة وتظيفي الباقي من التوابل العادية والبصل والثوم والزيت ..الخ

والخضر بلا ماء لانك درتي الماء الكافي من الاول
ثم تقفلي على الكل مع الدجاج من جديد
البنة ؟؟؟؟؟؟؟
يا سلالالالالالالالالالالالام !!!
والله نتي كتاكلي وريحة البنة طالعة مع نيفك

لانك طبخت الوصفة بمرق الدجاج وليس بالماء

طبقي هاد الفكرة على اللحم والسمك

السمك خليه يغلي شوية باش تاخذي منو مرق السمك

عاد زوليه وطيبي الخضر في مرقه .



 سوس بيشاميل

كتشدي معلقة زبدة ياكي دوبيها في كسرونة على نار مهيلة منين دوب زيدي عليها معلقة ديال طحين وخلطي كلشي وبقاي تزيدي الحليب على حسب الكمية اللي بغيتي متلا ربع لتر والا كان كتر زيدي في طحين والزبدة المهم منين كتزيدي داك الحليب كتبقاي تحركي بالمغرفة ديال اللوح حيت ديال الالومنيوم كتشد فيها طحين اما المغرف اللوح كتحركها مزيان وعندك يتكورلك خاصكي متغفليش عليه بتحراك وكتحكي قطيرة الجوزة تبنينة وشوية الملح وكتبقاي تحركي تحركي حتى كتحسي باللصوص بدات تقال وتخترت ايوا وصافي صايبي بيها اللي بغيتي نتمنى نكون فهمتك

*** التغرية هي منين كيطيب الطياب وكتحلي عليه كتحيدي الغطاية وتعملي الكوكوط فوق العافية مهيلة وتخلي داك طياب يندامج والا كان فيها شي ماء كتير يقل وتختار

.

كريمة الزبدة...سهلة ....بنينة ....أو تصلاح لبزاف ديال الأكلات



أولا نبداو بالمقادير لي هي :
- 60 غ بياض البيض 2 kbaar
- 120 غ سكر سنيدة
- 187 غ زبدة
- ملعقتان كبيرتان من الماء

أولا :نديرو الما و السكر في كصرولة نخليوها طيب حتى نحصلوا على سيرو
ثانيا: يطرب أبيض البيض حتى يصبح أبيض كالثلج ثم نضيف له السيرو مع التطريب لكي نحصل على المرانغ
و أخيرا : نضيف المورانغ عل الزبدة مع التطريب لكي نحصل في الأخير على الكريما التيي تتعدد استعمالتها و سأتطرق في مواضيع أخرى لحلويات تحضر بهاته الكريما
* للتنسيم بالشكلاط أضيفي ملعقتان من بودرة الشكلاط
* للتنسيم بالقهوة أضيفي ملعقتان من القهوة

الخبز ديال الزرع راه كيديري الكمية اللي عندك وشوية طحين فورص باش ميجيكش الزرع قاصح والخميرة والماء دافئ كتخلطي كلشي في قسرية وتعركي مزيان ودبزي اهم حاجة في الخبز هي هاد المرحلة ديال العريك وتدباز ومنين تحسي بالعجينة تجمعتلك مزيان كتعمليها كويرات على حسب شحال بغيتي من خبزة ايوا ودوري داك الكورة مزيان على يدك بشووية الزرع وتغطيه واحد 10 د ومن بعد كرصيه وخليه يخمر خاصك تغطيه وتخليه حتى تحسي بيه خمر وديري شوية طحين في طاوة وديري الخبز ودخليه

والا بغيتي بسبيسيال كديري طحين فورص وسبيسيال ونفس الطريقة نتمنى نكون فدتك شوية

لكريم فريش

الا كان كيجيكم الحليب ديال البقر بالعبار غتبقاي قبل ماتفيضوه تشدي شي طاسة تبقاي تجمعي داك زلال دياله مرة على مرة وانتيا حطاه في الفريكو حتى يتجمعلك مزيان وصايبي بيه لكريم

والا ماعندكش سيري شريها راه كتباع في لسوبر مارشي وجيبيها وخاصها تكون باردة مكلاصية باش تبغي طلعلك بسهولة وكتشدي حتى يدين الباطور حتى هما ديريهم يبرده باش طلعليك ومتعدبكش حيت الا كانت شي حاجة سخونة مكطلعش المهم كتعملي فيها قياسك ديال سكر كلاصي وتبقاي طلعي بالباطور مزيان وهاهي الكريمة واجدة وعملي بيها اللي بغيتي









اللحم كيتعمله ليقامة فحاله فحال الدجاج

الا بغيته تعمله اللحم بوحده
كتشدي اللحم كتشلليه بالماء واحد شوية ماشي بزاف باش ميبسلش بالماء غير شلليه

ومن بعد تعمليه في طنجرة وتعمليله ديك ليقامة مخلطة اللي قتلكم وشوية ليبزار والملح وكتشدي قسبور ومعدنوس وتعمليله الخيط وتعمليه في طنجرة بلا متكرضيه وتحكي بصلة كبيرة وشوية الملون وكتعملي تومة محكوكة وكتخلي داكشي يتقلى في شوية الزيت
ومنين يتقلى تزيدي عليه شي 3 بصلات كبار مشلضين صغار وتعلي الماء اللي يغطيها وشوية زيت زيتون وتسده عليه الكوكوط شي ساعة حيت كيبغي الطياب خصوصا البكري ايوا منين يطيب كتعمليه يتغرا شوية وهاهو بالصحة والراحة كيجي لديد وخاتر


الكرعة الخضرا باللحم

كطيبه اللحم عادي كديرليه نفس اللي قتلكم على لخور غير هو ان قسبور ومعدنوس هاد المرة كرضوه والبلة عمله غير وحدة صافي مشلضة حيت كاينة الخضرا
المهم منين تحسه انه اللحم بدا يطيب كتشده الكرعة تنصته مزيان الا بغيته تسرعه الكرعة تمشيو السوق وتختاره الكرعة صغيرة جاع الخضرا عرفته علاش هي اللي كتجي بنينة في طياب اما ديك الكبيرة فهي كتجي باسسسسسسسلة المهم منين كتشريو داك صغيرة وبقا جديدة يكون لونها خضر كيبرقق ههههه كيتشدها تحيدلها القلب ديالها وتقسمها غير على 2 و كتعملها فوق داك اللي اللحم اللي صافي طاب او قرب يطيب و كتشدي 2 مطيشات تحكيهم فوق منها وشي معلقة صغيرة ديال القرفة وشوية زيت بلدية عرفته القرفة ومطيشة هي اللي كتسرعها وتجي بنينة اه حقا وياكم تم وياكم تديره الماء كتير او يكون فيها المرقة كتيرة حيت عرفته علاش ؟ الكرعة كطلق الماء يكون غير شوية المرقة وهي واللحم وسده عليها شي ربع ساعة او كتر راها كطيب دغيا او اللي كان عندكم الوقت بلا متسده عليها باش كتحلكمش ايوا وحله عليها وخليوها تختر وهاهي بالصجة والراحة

هههههههههههههه الله اعطيك الخييييير ضحكتني شكرا علي المعلومااااات

youni كتب:هههههههههههههه الله اعطيك الخييييير ضحكتني شكرا علي المعلومااااات

شنو دحكك ههههه

هدووووووووك كليييمات لي كتزدي فييييييهم

youni كتب:هدووووووووك كليييمات لي كتزدي فييييييهم

هههههههههههه

بصحتك الزين

الله اعطيييييييييييييييك الخير