حصريا طريقتي في الاحتفاظ بالقوق

من طرف basoma الأحد 27 أبريل 2014 - 20:01

حصريا طريقتي في الاحتفاظ بالقوق
اخواتي الانيقات كيفما كتعرفو العديد من النساء كيكرهو يصايبو القوق لانه اولا كيكحل اليدين و ثانيا كيتاكسد دغيا خصك نتي كتقشر فيه و في نفس الوقت كتديرلو الحامض يعني عملية متعبة
اليوم جبتلكم طريقتي الي كنحتفض بها بالقوق ف المجمد وغا يدوز الموسم ديال القوق و كيبقا ابيض بلا منستعملو الحامض. .

نبداو على بركة الله
الخطوة الاولى خصك ديري الليكات les gants انا داك النهار مكانوش عندي من بعد كنخدو القوق كنزولو القشور اللي في الوجه و بلا منزول داك القلب اللي فيه فحال الشعيرات حيت ادا زالو هادوك كيتاكسد القوق

كنبدا كنقشر فالقوق حتى نسلي الكمية اللي عندي انا كنت شاريا 3 كيلو ولكن مكنزولشي المنطقة الي فيها الشعيرات

كنحصل على هاد الشكل
كنكمل الكمية اللي عندي كلها

من بعد كنغسلو مزيان
كنديرو القوق فطنجرة و كنسلقو مع مليحة غير شوية بحيث يبقا اللون ديالو اخضر
من بعد كنصفيه و نخليه حتى يبرد
و الخطوة الموالية كنبدا نكمل التقشار ديالو غير بالمهال و دك الطبقة ديال الشعيرات كتزول بسهولة و بلا منستعملو الليكات فهاد المرحلة
و فالاخير كنحصل على قوق ابيض بلا منستعمل الحامض

في النهاية كندير الكمية الي كنحتاجها ف البلاستيكات و نديرها ف المجمد حتى نبغي نصايب شلادة ولا مريقة ولا كرتان.........على حسب الشهوة و ادا خليناه يقطر من الماء مزيان مكيلصاقش في بعضو فبعضو فالمجمد و ممكن نديرو بزاف فبلاستكة وحدة

الي عجبتها طريقتي تدعي m3aya.