زيارة مولاي إبراهيم طير الجبال

العطفة يا بو سالم يا مول الناقة وليزار الي عليه رميت العار يا الحاكم في محلة الكوحل بواب كناوة تسليم ارجال الله
هاد الموضوع غادي نحط فيه الزيارة ديال مولاي إبراهيم صاحب الهجالة مع ليتيم الي ظهرت بركاته في أنحاء العالم ويقصده الزوار والمريدين من كل الأنحاء التماسا للبركة والشفاء ولأي غرض ومن كذب ببركة الأولياء فليس له نصيب في علمنا العلم اللدني الرباني الذي يهبه الله لمن أخلص النية وكيما قالوا سيادنا اللوالى صفي تشرب ومول النية يربح يربح
هادي دائرة الجدب والمجاديب الداخل ليها عمرو ما يخرج منها يبقى ديما مجدوب ليها وديما هازو الحال عليها
المهم بلا ما نطول عليكم
مولاي إبراهيم اشتهرت بركته بأن شحال من عاقر ولدات فيه وشحال من وحدة محنها ميمون تشافات فيه والي غادي على شي غرض كيقديه
زيارتو كتبدا من دارك كتعقدي النية على داك الشي الي باغاه وكتسلمي وتمشي بالنية ماشي غادية وشاكة
المهم ملي كيحطك الكار في المحطة في مراكش كتشدي طاكسي صغير ولا هويندا ولا تريبورتو
هادو للناس الي ما عندهمش السيارة
كتقولو للسائق يديركم لسيدي ميمون ملي كيحطكم في سيدي ميمون كتسولو على الطاكسيات ديال مولاي إبراهيم
ملي توصلوا لمولاي إبراهيم كتكرو دار ولا بيت على حساب الإمكانيات ديالكم
والزيارة كتكون 3 أيام لأن ضيافة النبي 3 أيام
المهم ملي غادي تبغي تدخلي للضريح غادي تشري جوج قراعي ديال الزهر وحدة ثقبيها عند الي غادي تشريها من عندو والأخرى خليها هكاك
وغادي تشري بكية ديال الشمع صغيرة ما تحليهاش وغادي تشري 3 الشمعات ولا 2 ولا الي بغيتي وغادي تدخلي مع الباب غادي تماي غادية وكترشي الزهر حتى توصلي للضريح غادي تدوري بيه وأنت كتسلمي عليه وكترشي عليه في الزهر وغادي تحطي القرعة الي ما محلولاش فوق منو وكذلك الشمع الي ما محلولش وغادي تريحي تما على الأقل واحد نصف ساعة ونتي وحالك كاين الي غادي يرتاح كاين الي غادي يتقج كاين الي غادي يطيح كاين الي غادي يبدا يبكي كاين الي غادي يترفع كل وحالو تا يمشي بحالو
ملي تدوزي الشرع ديالك غادي تخرجي وتزوري لالة محلة بنت مولاي إبراهيم راه كاينة غا تما حداه وديري الحنة غادي تلقاي واحد البانيو محطوط تما فيه الحنة غمسي فيه إيديك بالنية الصافية ونوي داك الشي الي باغا
وسيري للبلاصا فين كيشعلو الشمع وشعلي دوك الشميعات الي شريتي وكل شمعة نوي فيها شنو باغا
النهار الآخر غادي تهبطي للرحى ديال مولاي إبراهيم غادي تنزلي في طاكسي ب5 الدراهم أو يمكن ليك تنزلي على رجليك إلى كنت سبورتيف
ملي غادي توصلي للرحى غادي تشري شميعات الي غادي تشعلي فيه وقرعة ديال الزهر وشري مشطة ودخلي خلصي 10 الدراهم ودخلي غادي تشعلي الشميعات وتنوي داك الشي الي باغا وتخوي قرعة الزهر في السطل وخويه عليك كامل وهلي غسلي ومشطي ولوحي المشطة تما وأيضا ملابسك الداخلية من سوتيان ومايو وخرجي وحاولي ما تنشفيش من الماء خليه تا ينشف وحدو أو لبسي عليه حوايجك وخرجي بحالك سيري دوري في الواد وتساراي ليك مع راسك وفوجي الطبيعة زينة تما
ويمكن ليك من بعد تمشي للكسكاس والقصعة راه كاينين تما في مولاي إبراهيم غا سولي عليهم ويوروهم ليك
وبصحتكم الزيارة
هادي الزيارة العادية الي بدون ذبايح
بالتوفيق
منقول للافادة