زيارة سيدي شمهروش

سيدي شمهروش فقيه الفقهة وقاضي الجن الحاكم على المحلات والمحكمة الكبرى في المغرب
مقامه ومحكمته كاين في إمليل كتشدو طاكسي من مراكش لإمليل ديريكت ولا كنتو سبقتو مولاي إبراهيم فكتشدو الطاكسي من مولاي إبراهيم لإمليل او من مولاي غبراهيم لأسني ومن أسني لمولاي إبراهيم
المهم ملي كتوصلو لإمليل فراه كاينة الطريق من إمليل لسيدي شمهروش بعيدة شوية تقريبا شي ساعتين إلى مشيتي على رجليك
كاينين البغال كيدو من امليل حتال سيدي شمهروش على حساب ممكن توصل المشية حتال 100 درهم
ملي كتوصلو لسيدي شمهروش وهو جا في الجبل جبل توبقال في الشتاء كيكون الثلج من الأحسن تمشو ليه في وقت الربيع أو الصيف
كاين الشلال تما والمياهات والجبال منظر خلاب رائع
كاينين بيوت تما كتكرو بيت وتدخلو تزورو مقام سيدي شمهروش ودخلو معاكم الشمع والزهر وشي قالب ديال السكر للحفيظ
وإلى بغيتو تدخلو معاكم تا الغطيان تهدوهم لسيدي شمهروش دخلوهم
كتزورو المقام وتريحو حتى يقرب المغرب كتنوضو تشعلو الشمع راه كاين البلاصة الي عند عتبة الباب هي الاولى شعلو فيها وكاينة الي لداخل عند المقام حدا واحد الصندوق ديال الحديد
النهار الآخر غادي تشرو الشمع الملون او البيض الي بغيتو
وبكية ديال الحنا ولا 3 الي بغيتي بغيتي باكية وحدة تفرقيها على الملكات فرقيها بغيتي كل وحدة تشري ليها بكية ديالها شري
وغادي تشرو بكية ولا 2 ديال عود الند
وغادي تسولو على مقامات الملوك
غادي تبداو بمقام ميمون لغمامي هو الأول غادي تشعلو فيه عود الند وشمعة
وغادي تطلعو لمقام الباشا حمو تاهو نفس الشيئ غادي تعملو فيه
وهلي غادي تنزلو للكرنة تاهيا نفس الشيئ غادي تعملو فيها
وهلي غادي تدوزو لمقام لالة مليكة غادي تشعلو فيها الشمع وعود الند وتخوو فيها الحنة وبالنسبة للعيالات يمكن ليهم يزيدو مشطة والكحل والمرود وفاش كيديرو الكحل يحطوهم في مقام مليكة وميرة كذلك نفس الشيئ وأيضا مقام عايشة
النهار الآخر غادي تغسلو في الرحا ديال شمهروش وتشعلو فيه شمعة وعود الند وحطو تما شي قرطاس ديال الشمع وشي 2 دراهم ولا باش ما سخاكم الله
ولوحو تما شي حاجة من حوايجكم الداخلية ومشطة ديال الراس الي مشطو بيها
النهار الآخر غادي تمشو لمقام عايشة الواد يا الواد تسليم امولات الواد
بالنسبة للعيالات راه تمشي معاكم واحد المرا تما سميتها رشيدة باش تحضي ليكم
دورو معاها غا بشي 20 درهم وتوريكم كلشي
في مقام عايشة غادي تعملو نفس الشيئ الي عملتو في الرحا ديال سيدي شمهروش
من غسيل وطقوس
صافي من بعد يمكن ليكم تهبطو بحالكم
وبالصحة والراحة الزيارة

merhba