قصة مثل: فينكم آ غرّارات عيشة؟؟

قال ليك كانت واحد المرأة جمييلة و لي شافها كيحماق عليها, و كان راجلها ما زوين ما لا باس عليه ما والو, انسان عادي, له محاسنه و اخطاءه كما الناس كاملين.
و كان فيينما خرجت يتلاقاها شي راجل يقول لها اويلي على هاذ الزين كلّو ضايع مع لي مايستاهلو طلقي منو وانا نثقلك بالذ هب, والعيالات حتى هما يقولو لها طلقي منو و انا نعطيك خويا و لي تقول لها نعطيك ولدي سيدي فلان, و هما ياحسرة غير غايرين منها لان زوجها كان يبغيها و هي كانت حياتها مستقرة...
عيشة اغترّت بكلامهم و صدقتهم و حلمت بالفلوس و الزين و الجاه و طلّقت من راجلها.. ومابقى بغاها حتى واحد لا الرجال بغاوها للزواج ولا العيالات وفاو بوعدهم, نهار وراء نهار الزين ديال عيشة بدا يذبل مع الهم و الشمتة و راحت تدور عليهم و تقول: أفينكم آ غرّارات عايشة؟؟ هاهي عيشة طلّقات .... و ما من مجيب

نتمنى تكونو فهمتو المغزى من قصة هذا المثل

لي عندها شي بوركابى تشد فيه هكا او لا هد شى لي فهمت انا

أولا : المرأة الحرة هي لي ماتعطيش ودنيها لعباد الله, لانه ماشي كلشي باغي لك الخير, المنافقين و الحساد اعطاهم الله.
ثانيا: الانسان يقنع باللي مقسم له الله و مايكونش طماع: عصفور في اليد خير من عشرة على الشجرة.
ثالثا: الانسان ما يكونش مغرور ولو يكون آية من الجمال لان الجمال كيمشي مع الزمان و كيبقى غير المعقول..