طورطة بالبسكوي ونكهة القهوة روعة جربوها وحكمو

اشخباركم نتمنى تكونو بالف خير
انتما ولعزاز على قلبكم يارب

هذه الطورطة من سنوات وأنا كنديرها بالدقيق وكنسقيها بالقهوة كتجي روعة
مؤخرا جربتها بالبسكوي وسقيتها بالسيرو وجات أروع وقلت لازم نشاركم بها نتمنى تعجبكم انيقاتي




3بيضات
كاس قهوة معصرة
5 معالق سنيدة
5معالق زيت لآن لبسكوي بالزبدة
200غ بيسكوي مفتت ماشي مطحون
5 معالق كبار عامرين دقيق
خمارة ونصف ديال g7
2 معالق كاكاو
كاس قهوة للسقي
ملعقة قهوة سريعة ذوبان

التزييين طبعا على حسب الذوق والآهم على حسب الموجود عندنا
كان عندي شوية شكلاط ابيض وكحل بالمكسرات وشوية رقائق اللوز هما باش قديت لها وجهها ههههه


نطربو بيض وسكر سنيدة وزيت ولقهوة مزيان

نضيفو كاكاو ونسكافي

تم بيسكوي فتتو غير بإيدي تعمدتها باش يجيو الطريفات باينين وسط الطورطة

تم الدقيق ومن بعد لخميرة

دخلتها طابت غير خرجتها وسقيتها بكاس القهوة معصرة ومحلية

خليتها شي ساعة عاد قلبتها وسقيها بشوية السيرو

دوبت شكلاط مع شوية زبدة او قشدة طرية وغطيتها به

زينتها نصف بالشكلاط ابيض ونصف بالشكلاط كحل

ومن الجناب برقائق اللوز محمرين ولبقى فتتو ودرتو من الفوق

وهاهي بالصحة والراحة نتمنى تعجبكم أنيقاتي