قصة من الواقع

البنات غادي نزل لكم قصة رائعة قريتها وعجبتني ولكن الا قلوبهم رهاف مايقروهاش
الجزء 1
أنا صوفيا .. فعمري 26 عام .. غادي نعاود ليكم على أصعب لحظات وأصعب سنوات عشتهم هادي 6 سنين .. كانت حياتي عااادية .. حتال واحد النهار لي تبدلات حياتي .. لدرجة كنت كنتمنى لو نموت .. هادشي بدا منين .. بابا تحول لواحد الخدمة أخرى فمدينة أخرى ومشينا تحولنا .. سكنا فواحد الفيلا .. كانت الدنيا خاوية شوية تما .. وقدامنا واحد الأرض كبيييييرة خاوية .. كانت هاديك البلاصة ياللاه كيبنيو فيها الناس .. شهر اللول داز مزيان .. كنت أنا لي كبيرة فالدار وعندي جوج خوتي توام صغر مني .. مكنتش كنآمن بالجنون .. كنت كنقول غي تخربيق وصافي .. واحد المرة كانت عندنا خالتي .. وكانت مريضة .. كانو كيقولو فيها الصرع .. وكنا جالسين كنهدرو كانت جات تغدا معانا .. سمعت ماما كتقوليها .. إيوا مزال متبعة الرقية .. قاتليها آه دابا الحمد الله الجن لي كان ساكني خرج .. وأنا نجي بديت كنضحك .. قتليها لواه ساكنك بوبريص أويلي أخالتي راه هادشي غي تخربيق .. مالكم مزالين جاهلين .. نتي راه كان عندك مرض نفسي .. قاتلي سكتي سكتي دابا يسمعوك .. أنا بديت كنضحك وكنقوليها .. واجنون واجنون أنا مكنآمنش بيكم .. لي سميتو راجل فيكم يجي ليا .. وكنضحاااك .. مهيم دازت واحد 3 يام .. كنت دخلت بالليل للدوش كندوش .. وكنغني .. جاتقات عليا ماما .. صوفيا بنتي ليل هادا متغنيش فالحمام .. قتليها غادي تقولي ليا الجنون عاوتاني .. بديت كنضحك .. وكنقول واجنون والمجانين .. وافينكم .. إيوا طرا لي عامري كنت نظنو يطرا ولي بدل ليا كاع المفاهيم .. أنا غي باش نفقص ماما .. بديت كنقول الجنون كتسمعوني ؟
الى عجباتكم نحط التتمة

كيعجبني نقرا على الجنون التسليم التسليم كملي كملي

الجزء 2

حتى كنحس بواحد التصرفيقة نزلات عليا .. الضو مشا ليا من عيني .. مصدقتش .. ساليت دغيا ومشيت كنجري للبيت .. شفت فالمرايا لقيت يد مصورة ليا فحناكي .. بقيت كنرجف غي بحدي .. مقلتهاش للدار .. منين كتجي عندي ماما كنغطي وجهي .. حاولت نجلس ونفكر فهادشي .. قلت لا ميمكنش .. يكونو الجنون زعما؟ .. لا ميكنش أنا مكن آمنش بيهم .. صافي حاولت النسى .. وتكيت وطفيت الضو وغمضت عيني .. نعست محسيتش .. شوية حليت عيني غي بحدي .. معرفتش شنو فيقني .. طليت على الساعة فالتلفون لقيتها 2 ديال الصباح .. ياللاه جيت نغمض عيني .. حتى كيبانو ليت جوج نقاطي حمرين بااينين واخا الظلام .. جيهت الباب .. حليت عيني مزيان .. بانليا خيال كحل وهادوك عينين لي كيبانو ليا نقاطي .. أنا صافي مقدرتش نتحرك ولا نتفنفن .. غمضت عيني وزيرت عليهم .. عاودت حليتهم لقيت هداك الخيال قرب .. عاودت غمضتهم .. بقيت حليتهم لقيت الخيال جالس حدايا .. والله دقات قلبي بديت كنسمعهم .. غمضت عيني معاودتش حليتهم .. معاودتش تحركت بقيت فنفس الوضعية .. حتى سمعت أذان الفجر .. نضت كنجري محليت عيني حتى خرجت من البيت لقيت ماما وبابا فايقين للفجر .. ماما شافتني قاتلي مالك أبنتي دايرا المكياج بالليل .. قتليها أشمن مكياج .. قاتلي سيري شوفي فالمرايا .. مشيت شفت لقيت وجهي مزوق بحال شي عروسة .. قلت لماما والله ما أنا .. بدات كضحك قاتلي وشكون غادي يكون .. سيري سيري الحمقة غسلي هداك الوجه ورجعي تنعسي .. غسلتو ورجعت البيت .. شعلتو الضو .. وحليت الشرجم والبالكون .. وأنا كان عندي بيتي بحدي .. منعستش .. بقيت كنفكر فهادشي لي طاري ليا .. حاولت نبين راسي قوية .. مبغيتش نعاود للدار والو حيت غادي يضحكو عليا .. واخا هادشي كامل مزال مكنآمنش بالجنون .. منعستش حتى صبح الحال .. حاولت نسى .. دوزت النهار مزيان .. فالليل مقدرتش نعس .. حليت البالكون ودرت كرسي وجلست فيه .. كنت مقابلة مع هاديك الأرض الخاوية لي قدامنا .. شوية حتى كيبان ليا

شوية حتى كيبان ليا .. شي خيال فهاديك التيرا .. واخا الظلام .. بان ليا واحد حاط حداه خنشة بيضا كبيرة .. وكيحفر .. أنا بقيت حاضيا .. حتا شفتو حفر حفرا وخشى فيها الخنشة ومشا .. أنا قلت هادي شي جريمة .. على غد ليه غي فقت الصباح خرجت كنجري .. مشيت شفت لقيت حتا حاجة مكاينة .. قلت أويلي واش كنحلم ولا شنو .. مهيم هداك النهار .. خرجت معا شي صحباتي .. تصورنا ضحكنا ونشطنا .. رجعت للدار .. وليت غي كنرجع للدار قلبي كيتقبط عليا .. كنحاول نسي .. دخلت بديت نغني فالدار .. ونلعب مع خوتي غي باش نسى .. دخلت الحمام وجبدت التلفون وجلست كنتصور مع المرايا .. تصورت التصويرة اللولة .. وبغيت نشوفها .. شفتها قلبي كان غادي يسكت .. لقيت عينيا مبدلين .. عينيا بحال عين شي مشة .. قلت يمكن غي حركت يدي والتصويرة جات فلو .. عاودت نتصور باش نتأكد .. هاد المرة قلبي كان غادي يسكت حيت شفت عينيا نيت بحال ديال المشاش .. ولي زاد سكانتاني هو الخيال الكحل لي بان فالتصويرة.. صفاريت درت ورايا ملقيت والو .. مشيت كنجري للبيت .. وعاودت كنشوف التصاور .. لقيت بيلا حتى التصاور لي تصورت مع صحباتي فيهم واحد الخيال كحل .. لحت التلفون من يدي تخلعت .. هاد المرة تأكدت بيلا شي حاجة ماشي حتال اللهيه .. جا الليل وكنت جالسة فالبالكون حتى لقيت

الجزء 4

حتى لقيت عاوتاني شي حد كيحفر و هاز خنشة ..
وقفت وقلت والله حتا نعيط للبوليس .. ياللاه داخلة البيت باش نهز التلفون .. ومعا البيت كنت طافية فيه الضو .. دخلت فالظلام وغادا نشعل الضو .. حتا شفت باب البيت محلول .. وسمعت صوت ماما .. قالت ليا علاش غادي تعيطي على البوليس .. قتليها أويلي أماما آجي آجي شوفي شنو شفت .. وخرجت البالكون وقتليها آجي .. وقفت كنتسناها تبعني مجاتش .. دخلت للبيت قتليها واتي فينك .. تصدمت مكاين حتى حد فالبيت والباب مسدود .. بقيت مسمرة فبلاصتي .. متحركتش .. حتى بسرعة مشيت كنجري حليت الباب ومشيت لبيت ماما.. كندق وكنغوت ماما ماما .. خرجات عندي قاتليا مالك مالك .. ياللاه جيت نهدر .. لقيت راسي شي حد رجعني للبيت ولقيت راسي باقا مخرجتش منو .. صافي هنا بلت فسروالي .. بديت كنغوت ماما ماما .. حتى جا بابا وماما لقاوني طايحة فالأرض .. قاتليا بسم الله عليك مالك .. قتليها نتي ماما ولا غي كنتخيل عوتاني .. جات عنقاتني .. قاتليا الله يابنتي مالك ..بديت كنبكي .. وكنعنقها .. وعاودت ليهم .. قالو ليا غي كتحلمي .. قتليهم لا راه شي حد شفتو كيحفر .. قالي بابا صافي غدا نعيطو على البوليس يجي يشوف .. منعست حتى نعست حدايا ماما .. على غد ليه .. بابا عيط على البوليس وجاو .. وريتهم البلاصة .. مالقاو والو قالو لينا راه ميمكنش راه هاد البلاصة باينة عمرها تحفرات .. راه الربيع نايض فيها .. كون تحفرات كون كان باين .. بابا قالي راه غي كيتخيل ليك .. حيت كتسهري بزاف مع الأنترنت وليتي كتخيلي هادشي .. حاولت نقنع راسي حتا أنا بهادشي .. ماما 3 يام وهي كتنعس حدايا .. واحد النهار .

اوا نشوف الى عجباتكم نكمل ههههه اوطلبو تسليم ههههههه

راه كنقرا انا عجبتي كملي كملي انا راه تبورشت

غي كملي حبيبة حنا معاك

اوكى زوينات

الجزء 5

واحد النهار كان عندي عيد ميلاد ودرت حفلة فالدار .. درنا حلوة كبيرة وكنا كنحتفلو .. طفينا الضواو باش نطفي الشمع .. ياللاه غادي نطفي الشمع وهو يتطفا .. شعلو الضو .. بداو كيضحكو .. قالو ليا مالك على هاد السوطا كاملة كنتي غادي طيري الحلوى .. واعندك سوفل خطير .. قتليهم ولكن أنا مطفيت والو ماشي أنا لي طفيت الشموع .. صقلو وبقاو يشوفو فيا ورجعو كيضحكو .. قتليهم متيقتونيش راه والله ما أنا لي طفيتههم .. واااااالو متيقونيش .. وفعلا ماشي أنا لي طفيتهم .. صافي مبقيتش كنأكد عليهم .. مهيم دازت هديك العشية .. فليل دخلت لبيتي باش نعس .. ماما كانت فبيت لاخر مع خوتي صغار حيت كان واحد فيهم مريض .. واحد الشوية نضت بغيت نمشي نشرب .. دزت من حدا الحمام .. لقيتو شاعل وبحالة لي شي حد كيدوش .. دقيت وقلت ليه بابا هادا نتا ؟؟ .. قالي آه أبنتي عفاك أبنتي سيري لبيتي جيبي ليا الفوطة راه نسيت مدخلتها .. ومشيت لبيت نعاس .. شعلت الضو .. حتى تصدمت من لي شافت عيني
تصدمت .. لقيت بابا ناعس .. قتليه بابا بابا .. فاق قالي مالك .. قتليه وقتاش ساليتي الدوش .. قالي الله يابنتي أشمن دوش .. راني من البارح مدوشت .. قتليه ولكن راك عاد كنتي فالحمام وقلتي ليا جيبي الفوطة .. قالي بنتي ماشي وقت الضحك هادا .. قتليه صافي تصبح على خير .. مشيت لبيتي .. دخلت وجلست .. وبديت نبكي .. وكنقول مالي آش طرا ليا .. حتى كتجيني واحد التصرفيقة .. صافي هنا بديت نغوت نغوت نغوت .. ناضو الدار جاو عندي .. جابو ليا فهدوك نصاصات الليل واحد الآمام بدا كيقرا عليا القرآن .. .. عاد رتاحيت ونعست .. وليت كنخاف .. مبقيتش نقدر ننعس . مبقيتش نقدر نجلس فالظلام .. واحد النهار .. كنت جالسة كنتغرج بنهار ومتكية .. حتى داني نعاس .. شوية بديت كنحس بشي حد كيجرني من شعري .. حيت كان مطلوق ومسرحاه على الوسادة ورايا .. شوية بالخف شي حد بدا كينتفني بزاف .. وشي حد كيجرني من رجلي وشي حد كيجرني من يدي .. وأنا كنغوت حيت بديت كنحس بحالة غادي يفصلوني .. بديت كنحس بالألم .. مرجعت على وعيي غي على صوت ماما .. صوفيا رجوع الله أويلي أبنتي علاش كتنتفي راسك .. عاد هداكشي حبس .. تخيلو لقيت .. نص ديال شعري منتوف .. دنيا عمرات زغب ..لقيت كمشة ديال الزغب فيدي.. قلت لماما آش طرا .. قاتلي أنا جيت أبنتي لقيتك كتركلي وكتنتفي فشعرك بواحد الطريقة بحالة الشعر ماشي شعرك .. صافي غي قاتلي هادشي فقدت الوعي محسيتش براسي .. حتا حليت عيني لقيت راسي فالصبيطار .. غي حليت عيني وأنا نشوف

الجزء 6

غي حليت عيني وأنا نشوف غي الظلام .. سمعت ماما قاتلي على سلامتك .. قتليها ماما علاش كاين الظلام .. قالت ليا الله يابنتي هاد الشميشة كاملة لي ضاربة فالبيت ومشفتي والو .. قتليها ماما كنشوف غي الظلام .. مشات كتجري عند الطبيب .. جا قلب ليا عيني .. قاليا متخافيش راه عندك عمى مؤقت .. متخافيش غي شي يامات ويرجع ليك الشوف .. قاتليه ماما ومناش تعمات .. قاليها من التوتر لي عايشة فيه .. وهاد الحالات نادرة .. ولكن متخافوش غادي يرجع ليها .. بدات ماما كتبكي بديت حتا أنا كنبكي .. وتخلعت كثر .. رجعنا الدار .. وليت غي جالسة مكنتحركش .. واحد النهار جالسة وماما شاعلة ليا التلفازة .. كنسمع غي للصوت .. حتى كنحس بشي حد حط يديه على عيني .. قلت ماما .. جاوبني واحد الصوت غليييظ ومبحبح وكيهمس ليا فودني.. لا أنا راجلك .. معقلتيش على نهار عرسنا .. أنا حيدت ليك الشوف باش متبقايش تشوفي شي حد غيري .. وبغيتك تقطعي شعرك .. وبلا متعانديني أنا مغاديش نبعد عليك .. حيت نتي ديالي .. خاصك تبقاي تسمعي ليا هدرتي .. قتليه بعد مني بعد مني جات ماما .. قاتلي معامن كتهدري شكون يبعد عليك .. قتليها ماما بغيت نقطع شعري .. قاتليا علاش ياك كنتي حالفة متقطعي شعرك .. قتليها لا بغيت نقطعو صافي .. داتني هداكسع نقطعو .. قطعتو ورجعنا الدار .. وليت عايشة غي بزز .. ولا لي طلبها مني كنديرها .. لدرجة واحد النهار نقتل خويا الصغير .. وليت كنتصرف بلا هوايا .. وفعلا مشيت قاصدة بيت خويا باش نقتلو .. كنحس بشي حاد لي جارني .. مكنتش نقدر نتراجع .. دخلت للبيت .. سمعت خويا قالي ختي مال نيفك خارج منو الدم .. غي حسيت بيه قرب وشديتو من عنقو بدا كيغوت .. جات ماما لقاتني شانقة عليه .. حيداتو من يدي .. قاتلي واش حماقيتي .. قتليها راه هو لي قالها ليا هو لي قالها ليا .. عفاك أمام قليه يبعد مني .. راه مكيتفرقش عليا .. هو بدا كيهمس ليا فودني .. قالي سيري هزي واحد الزيزوار راه فالحمام حدا ريحتك .. وضربي بيه يديك .. وغادي نبعد عليك .. مشيت كنجري واخا مكنشوفش .. كنحس بيه هو كيوريني الطريق .. مشيت هزيت الزيزوار وضربت يدي بجوج .. جات ماما كتجري بدات كتغوت .. عيطات على بابا وعلى الإسعاف .. جات ربطات ليا يدي .. بلا منحس صرفقتها وقتليها بعدي مني .. خلي دم يخرج .. هو راه عزيز عليه الدم .. بعدي مني ولا نقتلك .. خافت وخرجات من الحمام وسدات عليا .. جاو الإسعاف .. بغاو يحلو الباب .. مبغاش يتحل .. ماما كتقولي حلي الباب .. كنقوليها لا راه مبغاش يحل ليكم .. واحد الشوية مبقيتش حسيت فقدت الوعي .. محليت عيني حتال السبيطار .. عاودات ليا ماما كاع هدشي لي درت وقاتلي بيلا غي هرسو الباب .. الشوف باقي مرجعش .. وباقا كنحس بروحي تقييييلا بحالة شي حاجة محطوطة عليا .. جابو إمام حتال السبيطار بقا كيقرا عليا .. وشربوني ما ديال القرآن .. غي بدا كيقرا عليا القرآن .. وكيرشوني بالما ديال القرآن .. بديت كنغوت .. وكنتركل .. وكنضرب يدي بزوج حتا عاود رجع النزيف .. حبس مقدرش يكمل .. لي أنا يدي ولات كلها دمايات .. بقيت فالسبيطار 4 يام .. اليوم الخامس رجعت للدار .. كنت جالسة معليا ما بيا حتى ..

الجزء 7

كنت جالسة معليا مابيا حتا جا هداك الجن كيهمس ليا فودني .. علاش مكتسمعيش الهدرة .. متبقايش تسمعي للقرآن ولا غادي نشلك كاملة .. قتليه راه هما لي كيجيبوه .. دازت أيام وأنا على نفس الحالة .. ديما كيهددني وكيتحكم فيا الجن لي ساكني .. لدرجة تعايشة مع الوضع .. وبحالا ولفت .. واحد النهار حليت عيني فالصباح لقيت رجع ليا الشوف .. فرحت وتضت كنقز .. ماما فرحات .. بابا كان فالخدمة .. منين جا فالليل .. قالي غادي نعوضك على هاد ليامات لي مخرجتي فيهم ما شفتي فيهم . قالي وجدو راسكم غدا الصباح غادي نسافرو .. أنا فرحت مشيت كنجمع حوايجي .. وصلات 9 ديال الليل دخلت ندوش .. كنت كندوش .. حتى حسيت بالما مكينزلش مع القادوس .. شفت القادوس بان ليا الزغب ديال شعري هو لي حابسو .. جيت نحيدو .. حيدتو وبدين كنجر فيه .. مبغاش يتقادا بقيت نجر حتى لقيت راسي جارا جنية من شعرها .. أنا مشفتهاش مزيان بان ليا غي راسها وسمعت الغوتة ديالها حيت من بعد خرجات بسرعة وضربات فيا .. وعواجيت هداكسع .. فمي عواج يدي عواجو رجلي عواجو .. طحت ماما سمعات الطيحة .. جات كتجري .. هزاتني لبساتني عيطو على الإسعاف .. مشيت الطبيب قاليهم للأسف .. هاد المرض نادر لي جاها .. مهيم هو بدا كيفسر ليهم بطريقة علمية .. ولكن أنا عارفة بلي بيا .. رجعت للدار .. مابقيتش كنهدر .. كنأم أم بحال زيزونة .. مبقيتش كنتمشى وليت مقعدة .. دارو ليا غي كرسي متحرك .. وليت مسكونة من جن وجنية .. جنية انتاقما مني حيت قالتهالي .. وقالت لي بيلا متخرج مني حتى يخرج هو . و هو ماباغيش .. دارنا داوني لأحسن واحد كيدير الرقية ولكن للأسف مقدرش .. حيت غي كيبدا الرقية .. أنا الدم كيبدا يخرج من نيفي ومن فمي .. داوني الطبيب لقاو أنه كيجيني نزيف داخلي .. وغي بعون الله نقذوني .. وقاليهم إيلا عاود جاها النزيف تقدر تمشي فيها .. صافي دارنا مبقاوش يزعمو يديوني ندير الرقية .. إذن بقيت هاكاك .. كنت عايشة غي جسد بدون روح .. كنت كنتمنى الموت ليل ونهار .. ولكن ربي بقا مطول فعمري حتا نشوف مزال بزاف ديال الحوايج ... بقيت 3 سنين وأنا عايشة هكاك .. تخيلو مكاناكل وااااااالو النعمة مكندوقهاش .. ولكن غلاضيت وديما مكهومة وشبعانة .. كانت حالتي عجييييبة ومكدخلش الراس وكان كيقولو بيلا جنوني كيوكلوني ..

الجزء 8

بقيت 3 سنين على هاديك الحالة .. معاقة يدي عوجين فمي عوج .. مسكونة من جوج جنون .. مكنتمشى مكنهدر .. لي شافني كيبقى يشوف .. والديا حاولو يداووني .. داوني لفرنسا بقيت فيها 6 أشهر وأنا كنتعالج .. أو وااااالو باقا أنا هيا أنا .. كيقولو لينا بلي جسمي كيرفض العلاج .. وأني معنديش واحد القابلية باش نتعالج .. ولكن بالعكس .. بااااغا نتعالج .. رجعنا المغرب .. حاولت أني نوصل لعائلتي أني باغا نعاود ندير الرقية .. غي تمتمت وهما فهموني .. ولكن خافو إيلا يعاود يرجع النزيف .. وكيف كتعرفو قاليهم بيلا إلا عاود جاها غادي تمشي فيها .. بقيت كنأكد عليهم .. وأنا قلت لي ليها ليها .. مشينا عند الفقيه .. رفض مبغاش .. بديت نبكي ونشوف فيه .. بقيت فيه .. مهيم .. يالاه بدا يقرا القرآن أنا بديت كنتركل .. والدم عاوتاني بدا كيخرج ليا من نيفي وفمي .. وهو كيقرا أنا بدا كيتسرح فمي .. بديت كنقول ليه كمل كمل متحبسش.. حيت أنا هداكسع حسيت بيهم غادي يخرجو .. شوية .. بداو كيهدرو الجنون لي فيا .. أنا عاودولي غي الدار مهدرتش .. جني قال ليه أنا منخرج حتا تخرج هاد الجنية .. والجنية كتقول أنا منخرج حتا يخرج الجني .. وبعد صراع معاهم .. طلب منهم يحبسو النزيف .. وفعلا النزيف حبس .. بقا معاهم شي 2 سوايع .. عااااااد خرجو .. خرجو بجوج .. إيوا أنا من بعد ساعة فقت لقيت راسي فالسبيطار .. فقت لقيت راسي كنهدر وكنتحرك .. نضت هداكسع وتوضيت وصليت وحمدت الله .. رجعت كيف كنت .. لكن ياااافرحة ما تمت .. رجعو كيجيوني كوابيس .. رجعت كنشوف خيالات ورجعت كنشوف أمور كتحرك قدامي .. معرفتش علاش هادشي ولا كيجيني عادي نشوفو .. واحد النهار كنت خارجة .. شفت مش كحل معرفتش كيفاش حتا قلبي تقبط .. دغيا حيدت عيني .. وزدت .. شوية درت .. لقيت هداك المش جاي ورايا تابعني .. مشيت كنجرييي هربانة وكنغوت .. حتا لقيت قدامي واحد المرا شارفة لابسة البيض .. معرفت كيفاش شفتها فرحة .. وقفت عليها قلت ليها عافاك جري على هداك المش .. قالت لي بنتي خاصك تزوجي فأقرب وقت .. وزادت خلاتني مافاهمة والو ... درت ورايا باش نشوف واش مزال المش .. ملقيتوش .. جيت ندور باش نتبعها باش نسولها.. لقيتها غبرات .. بديت كنبكي وكنقول آش هادشي عوتاني .. آش هادشي لي جرا ليا .. رجعت بحالي للدار ولكن واخا هكاك قلبي رتاح منين شفت هديك المرا .. وكلامها بقا كيدور فراسي .. فالليل كنت جالسة فالبالكون وكنقرا القرآن .. شوية حتى كنشوف

الجزء 9

حتى كنشوف المش الكحل كيشوف فيا .. قلبي كان غادي يسكت .. وشوية بانت ليا هاديك المرا الكبيرة معرفتهاش منين خرجات .. وبانليا المش غي شافها وهرب .. هزات راسها شافت فيا وتبسمات ..حسيت بواحد الراحة .. دخلت ونعست .. أو وقفات عليا فالمنام .. قاتليا خاصك تزوجي فأقرب وقت .. قتليها علاش .. قالت ليا "الصمقمق" مغادي يبعد عليك حتى تزوجي .. قلت ليها شكون الصمقمق .. قاتليا الجني لي كان ساكنك .. بقات كتأكد عليا أني نتزوج .. فقت الصباح عاودت لماما كلشي .. قاتلي على حساب هاد الهدرة خاصك تزوجي .. قتليها آماما شكون يقبل بيا وأنا داز عليا هادشي كامل .. قاتلي عااادي راه ماشي نتي اللولة ولا الثانية اللي تسكني .. قتليها واش بغيتيني نمشي نقول عباد الله آجيو تزوجوني .. قاتلي لا .. ولكن هاد المرة إيلا جا شي حد مترفضيهش .. هاد القضية قلقاتني .. وليت كل ليلة كتوقف عليا هاديك المرا وكتقولي خاصك التزوجي الصمقمق راه كيقلب منين يدوز ليك ... كنت واحد النهار خارجة .. حتا تلاقيت بواحد الصديق شحاااال مشفتو .. قالي فين هاد الغبرة .. عاودت ليه كلشي من طق طق لسلام عليكم .. مسكين عنيه دمعات .. قالي كاع هادشي داز عليك قتلو آآآه .. مهيم رجعت أنا وياه على تواصل .. حتال واحد النهار قالي صوفيا خاصني نشوفك ضروري .. مشيت تالاقيت معاه .. قالي تزوجي بيا .. منكدبش عليكم قلت آه بلا منحس .. حيت كيف كتعرفو كان خاصني نتزوج .. مهيم قبلت .. جاو عائلتو تعرفنا .. دازت شي يامات ودرنا العرس .. لي كان مقلقني هو أنو هو كان كبغيني أنا لا .. مهيم تزوجنا .. غي تزوجت بيه وأنا نرتاااااااح .. واحد الراحة حسيت بيها فجسمي كلو .. كلشي فيا رتاح .. بحالة كنت هازة على ظهري شي ثقل .. دازت شي عام حنا مزوجين .. معاودت حلمت بحتى حاجة .. واحد النهار تناقشت أنا وياه وتخاصمنا وقلت ليه أنا مكنبغيكش .. تخاصم معايا .. ولكن لي غادي يزيد يمرضني .. هو كان هداك الصمقمق رجع كيجيني فصورة راجلي .. وكنت كندير معاه كلشي .. وهادشي معقت بيه حتا نهار غادي نعاود نتغاوت مع راجلي .. كان دخل ودواش معايا وقلت ليه كيفاش قضيتك كتهدر معايا غي وقتاش كتبغيني .. قالي وقتاش أنا قربت ليك ولا دويت معاك أصلا .. قالي ياك هادي شهر وحنا مخاصمين .. قلت ليه كيفاش ياك يوميا كتقرب ليا وكتجي حدايا .. قالي

الجزء 10

قالي الله يهديك هادي شهر مقربت ليك مامسيتك محاديتك واش كتحلمي .. صافي أنا هنا دارت بيا الدنيا .. وعرفت بيلا الصمقمق لي كان كيجي عندي .. وشرحت لراجلي كلشي .. متفهمنيش قالي حتال هادي ومنصبرش عليها .. خاصنا نطلقو أبنت الناس .. قتليه واخا غدا نبداو نقادو وراق الطلاق .. مهيم هاديك الليلة وقفات عليا فالمنام هاديك المرا الكبيرة .. وقالت لي تزوجي لي تبغيه .. مهيم دازت الأيام .. وطلقت .. حسيت بحالة غادي تعاود ترجعني الحالة .. وطلبت والديا باش يعاونوني نمشي ندير عمرة .. وفعلا وقفو معايا ..ومشيت أنا والوالد ديالي .. حيت ضروري .. فهداك المقام نسيت كلشييييي .. مبقات حتا حاجة كنحس بيها .. دوزت أحسن أيام عمري .. مسخيتش نرجع .. كنت خارجة كنتقدا شي هدايا لعائلتي .. حتا داز من حدايا واحد وقاصني فكتفي عتاذر مني .. قتلو ماشي مشكل .. ساليت العمرة ديالي وكنت فالمطار .. حتا كنسمع شي حد كيقولي .. يا آنسة يا آنسة .. درت وأنا نلقاه هداك لي تساطحت معاه هداك النهار .. كيهدر معايا وهو عينيه فالأرض هو مشافش فيا .. قالي ممكن تخليلي رقمك إلي فالمغرب .. قتلو علاش .. قالي يا بنت الحلال أبي أتزوجك .. قتلو أنا راه مطلقة .. قالي وفين هو المشكل .. خليت ليه الرقم وخلالي رقمو .. الصراحة حبيتو وبغيتو .. رجعت المغرب واتاصل بيا .. بقينا كنهدرو شي يامات وجا المغرب خطبني وتزوجني .. ومشيت عشت معاه .. حبيتو من كل قلبي .. نور عليا حياتي .. وكاع داكشي مابقيت حسيت بيه .. وليت مزياااااانة .. ولحد الآن أنا بخير .. وحتى حاجة مكتزعجني .. كنشكر ونطلب الله .. هادي قصتي مع الجنون .. معمركم تقولو مكاينينش .. ولا غادي يجرا ليكم ماجرا ليا .. وإيلا درتو دابا على الجيهة ديال الليسر ديالكم غادي تلقاو الصمقمق حاضيكم بعويناتو الحمرين .. شوفو مزياااااااااااااااان .. هااااووووووو
النهااااااية هههههههههههههههههههههههههههههههههههه
وتوتة توتة خلصت الحدوتة ههههه حلوة ولا وحشة ههههههه

حتى انا متبعا معك معندك متساليني زوينة دمعت عيني فالاخير
ايه الجنون الله ينيجنا منهم كاينييييييين ماشي مكاينين

فراشة الوادي كتب:حتى انا متبعا معك معندك متساليني زوينة دمعت عيني فالاخير
ايه الجنون الله ينيجنا منهم كاينييييييين ماشي مكاينين

حتا انا عجباتنى بزاف وعبرة لكل واحد كيقول ماكاينينش وغير مرظ نفسانى الى كيعانيو من الصرع

شكرا ياسمينة عجباتني القصة

الله ينجينا منهم شكرا ازين

فراشة الوادى امين اختى وبصحة توف الى دايرة دابا غزالة بحالك  اسيرة الماضى بصحتكم حبيبات

شكرا حبيبة قصة زوينة
ربي يخليك

  كنقرا ولحمي تيورش