العبرة من الحجاية

لحكاية بدات مع جوج تقاربو ..
ولـفو بعضياتهم و تحابو ..
ڭـالو خاصنا نزربو و نتـناسبو ..
جيب واليديك و عند لعدول نتكاتبو ..
واخا تخاصمو بزاف و تسابُّـو ..
رجعو تصالحو من بعد ما ضاربو ..

ڭالت ليه حبيتك و معاك بغيت نستاقر ..
تكون حلالي نصبر على قبلك و نكابر ..
نغسل ليك حوايجك من السروال تال التقاشر ..
نصلح ليك القوامج و نمسح ليك النظاظر ..
نسيق الدار كلها و نخمل دوك السدادر ..
نطيب ليك شهيوات بيهوم تربي الكتاف و البادر ..

هز عينو فيها وعطاها حلاوت الكلام ..
بغيتك و تمنيت تكوني ليا مادام ..
و نتهنا من سهير الليل و التخمام ..
ندير معاك ولد و بنية أُولا جوج توام ..
نخدم نطهلا فيك و نزهاو ڭاع ليام ..
نزورو مولاي براهيم و نتصورو فـ آمستردام ..

مع الـوقـت...

ما بقاتش مسوقة و بالظهر عطاتو ..
يدوي معاها شحال اُو ڭاع ما جاوباتو ..
يصوني ليها و التيليفون عليه سداتو ..
لي كانت باغا منو صافي راه خداتو ..
الجيب ليكان معمرو جات هي و خواتو ..
بـ الخف نساتو و بواحد آخر بدلاتو ..

حتا هو ما عطلهاش اُو دغيا عليها زرب ..
عيشها فـ قصة لغرام و شحال كذب ..
طمعها بجوج كلمات و ڭـاليها راني كانحب ..
ضويتي ليا حياتي اُو ناوي نجي نخطب ..
قضى حاجتو و على نمرتها ضرب ..
و بدا يقلب على وحدة جديدة علامن ينصب ..

المهم من هاد شي كامل لي بغيت نڭول ..
هو أنه مايدوم غي الصح والجد والمعقول ..
هاد التخربيق ماعمرو مايصدق ولا يطول ..
شحال قدك تجري وتسيفط فالمروسل ..
إلا طاح حبك على خدُّوج ولا الباتول ..
سير خطب وقصدو نتا وهي العدول ..

هاد الحب ديال والو فيه غي العذاب ..
مع الوقت غادي يبقا يبان ليك غي سراب ..
كون ولد الناس وماتكونش قليل الأدب ..
سير مع الواليدة ديالك ودير الصواب ..
ونتي باركة من شي ثقاف ولا حجاب ..
راه لي بغاك غادي يجي عندكم يدق الباب

شكرا على العبرة

هدا كلام صح

كلام صحيح شكرا غاليتي

شكرا على العبرة

تسلمين جد رائعة وتتكلم عن الواقع لي عايشينو
واخر بيتين شعريين عجبوني بزاف واخا القيدة
كلها روعة
ونتي باركة من شي ثقاف ولا حجاب ..
راه لي بغاك غادي يجي عندكم يدق الباب
كيف قلتي اختي مايدوم غير الصح